ಕರ್ನಾಟಕದ ಅವಧೂತ ಪರಂಪರೆ: ಸಾಂಸ್ಕೃತಿಕ ಶೋಧದ ನೆಲಮೂಲ ನೆಲೆ

Abstract

ಸಂಸ್ಕೃತಿ ಅಧ್ಯಯನದ ಸಂದರ್ಭದಲ್ಲಿ ಬಹು ಜನರು ಅಭ್ಯಸಿಸಿದ ಮುಖ್ಯಧಾರೆಯನ್ನೇ ಮತ್ತೆ ಮತ್ತೆ ಹಿಂಬಾಲಿಸಿ ಸಿದ್ಧಮಾದರಿಯ ಫಲಿತಗಳಿಗೆ ಬಂದು ತಲುಪುವುದು ಒಂದು ಬಗೆಯಾದರೆ, ಯಾರೂ ತುಳಿಯದ ದಾರಿಯಲ್ಲಿ ನಡೆದು ಕಿರುಧಾರೆಗಳನ್ನು ಗುರುತಿಸುತ್ತ ಹೊಸ ದರ್ಶನವನ್ನೇ ಕಟ್ಟಿಕೊಡುತ್ತ ನಡೆಯುವುದು ಇನ್ನೊಂದು ಬಗೆ. ಸಂಸ್ಕೃತಿಯ ಏಕರೂಪಿ ಮಾದರಿಯಿಂದ ಹೊರಬಂದು ನೆಲಮೂಲ ಸಂಸ್ಕೃತಿಯ ವೈವಿಧ್ಯತೆಯನ್ನು ಶೋಧಿಸುವುದು ಕನ್ನಡ ಸಂಸ್ಕೃತಿ ಶೋಧದ ಮುಂದಿರುವ ಸವಾಲು. ಸಂಸ್ಕೃತಿಯು ಬದುಕಿನ ಹೊರವಲಯವಾದ ಸಾಮಾಜಿಕ, ಆರ್ಥಿಕ, ರಾಜಕೀಯ, ಧಾರ್ಮಿಕ ಕ್ಷೇತ್ರಗಳಿಗೆ ಸಂಬಂಧಿಸಿದಂತೆ, ಮನುಷ್ಯನ ಒಳವಲಯದಿಂದ ಹೊರಟ ಭಾಷೆ, ಕಲೆ, ಸಾಹಿತ್ಯ, ಮೀಮಾಂಸೆ ಮುಂತಾದವುಗಳಿಗೂ ಸಂಬAಧಿಸಿದುದಾಗಿದೆ. ಅಷ್ಟೇ ಅಲ್ಲ ಮನುಷ್ಯನ ಪ್ರಜ್ಞೆಯನ್ನೂ ಪ್ರಭಾವಿಸಿ ಆಂತರ್ಯವನ್ನೂ ಅದು ಪ್ರತಿನಿಧಿಸುತ್ತದೆ. ಆದರೆ, ಕರ್ನಾಟಕ ಸಂಸ್ಕೃತಿಯ ಬಗೆಗೆ ಹೇಳುವಾಗ ಸ್ಥೂಲವಾಗಿ ಇಲ್ಲಿ ಆಳಿಹೋದ ರಾಜಮನೆತನಗಳು, ಅವರು ಸ್ಥಾಪಿಸಿದ ಸಾಮ್ರಾಜ್ಯಗಳು, ಇಲ್ಲಿನ ಮತಸ್ಥಾಪಕರು, ಸಾಂಸ್ಥಿಕ ಧರ್ಮಗಳು ಹಾಗೂ ಅವುಗಳ ತಾತ್ವಿಕತೆ.. ಹೀಗೆ ಪ್ರಧಾನವಾಗಿ ಪ್ರಭುತ್ವ ಹಾಗೂ ಧರ್ಮದ ವಿಚಾರಗಳನ್ನೇ ಪ್ರಮುಖವಾಗಿ ಪರಿಗಣಿಸಲಾಗುತ್ತದೆ. ಕೃಷಿ-ವಾಣಿಜ್ಯ, ಕಲೆ-ಸಾಹಿತ್ಯ ಮುಂತಾದ ವಿವರಗಳು ವಿರಳವಾಗಿ ಗಣನೆಗೆ ಬಂದಿರುತ್ತವೆ. ಇವೆಲ್ಲವುಗಳ ಮಧ್ಯೆ ಎಷ್ಟೋ ಸಂಗತಿಗಳು ಲುಪ್ತವಾಗಿರುತ್ತವೆ. ಹೊರಪದರದಲ್ಲಿ ಗೋಚರವಾಗದೇ ಸುಪ್ತವಾಗಿರುತ್ತವೆ. ಹೀಗೆ ಅಲಕ್ಷ್ಯಕ್ಕೊಳಗಾದಂತೆ ತೋರಿದರೂ ಜನಮಾನಸವನ್ನು ಪ್ರಬಲವಾಗಿ ಪ್ರಭಾವಿಸುವ ಹಲವು ಸಂಗತಿಗಳಿವೆ. ಅದನ್ನೇ ಕಿರುಪರಂಪರೆಗಳೆಂದು ಗುರುತಿಸುತ್ತೇವೆ. ಅವಧೂತ ಮತ್ತು ಸಿಧ್ದ ಪರಂಪರೆಗಳು ಕೂಡ ಈ ಕಿರುಧಾರೆಗಳಲ್ಲಿ ಪ್ರಮುಖವಾದವುಗಳಾಗಿವೆ.