ಕಾಮದಹನವೆಂಬೋ ಜಾನಪದೀಯ ಜೀವನ-ಕಥನ ಅನುಸಂಧಾನ

Abstract

ಭಾರತೀಯ ನೆಲದಲ್ಲಿ (ದೈವಿಕ ಅಥವಾ ಕ್ಷÄದ್ರ) ನಂಬಿಕೆಗಳೇ ಇಂದಿಗೂ ಈ ನರನನ್ನು ನಡೆಸುವ ಕಾರಕಶಕ್ತಿಗಳಾಗಿದ್ದು, ಅವುಗಳ ಕಾಲ ಮತ್ತು ಸನ್ನಿವೇಶಗಳು ನಿಸರ್ಗದೊಂದಿಗೆ ತಳುಕು ಹಾಕಿರುವ ರೀತಿ ವಿಶಿಷ್ಠವಾದುದು. ಲೋಕ ನಿಯಮಕ್ಕೆ ವಿರುದ್ಧವಾದ ಮಾನವ ತನ್ನ ಒಳಗೂ ಮತ್ತು ಹೊರಗೂ ತನ್ನೊಂದಿಗೆ ತಾನೇ ಹೋರಾಟಕ್ಕೆ ಇಳಿದುಬಿಡುತ್ತಾನೆಂಬುದನ್ನು ಮಾರ್ಮಿಕವಾಗಿ ನುಡಿಯುವವರು ನಮ್ಮ ಜನಪದರು. ಈ ಬಗೆಯ ವೈರುಧ್ಯಗಳಿಂದಾಚೆಗೂ ಬದುಕಿದೆ, ಬಣ್ಣಗಳಿವೆ ಎಂಬುದನ್ನು ಜಗತ್ತಿಗೆ ಸಾರಿದ ಕೀರ್ತಿ ಇವರಿಗೆ ಸಲ್ಲುತ್ತದೆ. ಅವರೆದೆಯಲ್ಲಿ ಸ್ವಚ್ಚಂದ ಭಾವವಿದೆ, ಅದರೊಂದಿಗೆ ಸೃಷ್ಟಿಯ, ಸಮಷ್ಟಿಯ ಗೆಲುವಿದೆ. ಕಾಮದಹನದಂತಹ ಜಾನಪದೀಯ ಆಚರಣೆಗಳನ್ನು ನೆಪವಾಗಿಸಿಕೊಂಡು, ಅವುಗಳನ್ನು ಕೇವಲ ಮನರಂಜನೆಗಾಗಿ ಮಾತ್ರವೇ ಅಭಿವ್ಯಕ್ತಿಸದೆ, ಶ್ರಮಿಕ ಜಗತ್ತಿನ ಸೊಲ್ಲುಸೊಲ್ಲಿಗೆ ಸೋಲಿಲ್ಲದಂತೆ ಬದುಕಿದವರು, ಭವಿಷ್ಯಕ್ಕೆ ಉತ್ತಮ ನಾಳೆಗಳನ್ನು ನೀಡಿದವರು. ನಮ್ಮ ನೆಲದ ಇಂತಹ ಜಾನಪದ ಲೋಕವಿವೇಕವು ಜಗತ್ತಿನಾದ್ಯಂತ ವೈವಿಧ್ಯಮಯವಾಗಿ ಕಂಡುಬರುವುದು ಜಾನಪದ ಜೀವಂತಿಕೆಗೆ ಸಾಕ್ಷಿ.