ಮಹಿಳೆ-ಪುರಾಣ: ಸೃಜನಾತ್ಮಕತೆ-‘ಮಾಧವಿ’

Abstract

ಮಹಾಭಾರತ, ರಾಮಾಯಣದಂಥ ಪುರಾಣಗಳಲ್ಲಿ ಬಂದಿರುವ ಸ್ತ್ರೀಪಾತ್ರಗಳೆಲ್ಲ ಪುರುಷಪ್ರಧಾನ ಚಿಂತನೆಯ ಹಿನ್ನೆಲೆಯಲ್ಲೇ ರೂಪುಗೊಂಡಿರುವಂಥವು. ಕಪ್ಪು ಕಿವಿಯ ಬಿಳಿಯ ಕುದುರೆಗಳು: ಮಹಿಳಾ ಶೋಷಣೆಯ ಹಲವು ಮುಖಗಳ ಅನಾವರಣ ಈ ಭಾಗದಲ್ಲಿ ಹಲವು ಸ್ತ್ರೀಪಾತ್ರಗಳು ಕಾದಂಬರಿಯಲ್ಲಿ ಚಿತ್ರಿತವಾದ ಬಗೆಯನ್ನು ಪರಂಪರಾಗತ ನೆಲೆ ಎಂಬ ಉಪಶೀರ್ಷಿಕೆಯಲ್ಲಿ ಚರ್ಚಿಸಲಾಗಿದೆ. ಗಂಡು-ಹೆಣ್ಣು: ‘ಸ್ನೇಹ’ದ ನೆಲೆ ಎಂಬ ಉಪಶೀರ್ಷಿಕೆಯಲ್ಲಿ ಕಾದಂಬರಿಯ ನಾಯಕಿ ‘ಮಾಧವಿ’ ಹಾಗೂ ಆಕೆಯ ಬಾಲ್ಯದ ಸಖ ‘ಆದಿಮ’ರ ಪಾತ್ರಗಳನ್ನು ವಿಶ್ಲೇಷಣೆಗೆ ಒಳಪಡಿಸಲಾಗಿದೆ. ಗಂಡು-ಹೆಣ್ಣು: ‘ಸ್ನೇಹ’ಕ್ಕೆ ಹೊಸಭಾಷ್ಯ ಎಂಬ ಭಾಗದಲ್ಲಿ ಅವರಿಬ್ಬರ ಸ್ನೇಹವನ್ನು ಸಮಾಜ ಸ್ವೀಕರಿಸಬೇಕಾದ ‘ಸ್ವಸ್ಥ ಮನೋಭಾವ’ದ ನಿರ್ಮಾಣದ ಅಗತ್ಯದ ಕುರಿತ ಚಿಂತನೆಯನ್ನು ಒಳಗೊಳಿಸಲಾಗಿದೆ. ದೈಹಿಕವಾದ ಕಾರಣಕ್ಕೆ ‘ಅಬಲೆ’ ಎಂದು ಸಮಾಜ ಗುರುತಿಸುವ ಹೆಣ್ಣು, ವಾಸ್ತವದಲ್ಲಿ ದೈಹಿಕವಾಗಿಯೂ ಮಾನಸಿಕವಾಗಿಯೂ ಎಂತಹ ಶಕ್ತಿವಂತೆ ಎಂಬುದನ್ನು; ಜಗತ್ತಿನಲ್ಲಿ ಮಾನವೀಯತೆ ಇನ್ನೂ ಜೀವಂತವಾಗಿರುವುದರಲ್ಲಿ, ಆ ಮೂಲಕ ಸಂಸ್ಕೃತಿ ಉಳಿಯುವುದರಲ್ಲಿ ಹೆಣ್ಣಿನ ಪಾತ್ರ, ಕೊಡುಗೆ ಎಂತಹುದು ಎಂಬುದನ್ನು ಹೆಣ್ಣು: ಶಕ್ತಿ-ಸಂಸ್ಕೃತಿ-ಮಾನವೀಯ ನೆಲೆ ಹಾಗೂ ‘ಹೆಣ್ಣಾಗಿಸು’ವ ವಿವಿಧ ‘ಮಾನದಂಡ’ಗಳು ಎಂಬ ಉಪಶೀರ್ಷಿಕೆಗಳಲ್ಲಿ ಕಾದಂಬರಿಯ ಹಲವು ಸಂದರ್ಭ, ಸನ್ನಿವೇಶಗಳನ್ನು ವಿಮರ್ಶಿಸುವುದರೊಂದಿಗೆ ವಿವರಿಸಲಾಗಿದೆ. ಕೊನೆಯ, ಹೆಣ್ಣು: ವ್ಯವಸ್ಥೆ ಮತ್ತು ವಾಸ್ತವ ಎಂಬ ಭಾಗದಲ್ಲಿ ಹೆಣ್ಣನ್ನು ದಮನಿಸುವ ತೀವ್ರ ಸ್ಥಿತಿಯಲ್ಲೂ ಆಕೆಯಲ್ಲಿ ಅಡಗಿರುವ, ಫೀನಿಕ್ಸ್ ನಂತೆ ಪುಟಿದೇಳುವ ಜೀವಂತಿಕೆಯ ಶಕ್ತಿಯನ್ನು ಕಾದಂಬರಿ ಹೇಗೆ ಚಿತ್ರಿಸಿದೆ ಎಂಬುದನ್ನು ವಾಸ್ತವವಾದಿ ನೆಲೆಯಲ್ಲಿ ಗುರುತಿಸಲಾಗಿದೆ.