ಬೆಂಗಳೂರು ಭಾಗದ ಮೊಹರಂ ಆಚರಣೆ

Abstract

ಬೆಂಗಳೂರು ಕರ್ನಾಟಕದ ಪ್ರಾಚೀನ ಊರುಗಳಲ್ಲಿ ಒಂದಾಗಿದೆ. ಇಲ್ಲಿ ಧಾರ್ಮಿಕ ಸಮನ್ವಯದ ವಾತಾವರಣವನ್ನು ಹೊಂದಿದ್ದAತಹ ನಾಡು. ಇಲ್ಲಿ ಸುಮಾರು ಶತಮಾನಗಳಿಂದ ವಾಸಿಸುತ್ತಿರುವ ಇಸ್ಲಾಂ ಧರ್ಮದ ಅನುಯಾಯಿಗಳ ಆಚರಣೆಗಳು ಸ್ಥಳೀಯ ಸಾಂಸ್ಕೃತಿಕ ಪರಿವೇಷದಲ್ಲಿ ತಳುಕು ಹಾಕಿಕೊಂಡು ಧಾರ್ಮಿಕ ಸಮನ್ವಯತೆಯನ್ನು ಮೆರೆದಿರುವುದಕ್ಕೆ ಇಂದಿಗೂ ಸಾಕ್ಷ್ಯಗಳು ದೊರೆಯುತ್ತವೆ. ಮೊಹರಂ ಆಚರಣೆ ಮತ್ತು ಕರಗ ಉತ್ಸವ ಇದಕ್ಕೆ ಉತ್ತಮ ನಿದರ್ಶನವಾಗಿದೆ. ನಗರ ಜಾನಪದವೆಂದು ಗುರುತಿಸಬಹುದಾದ ಮೊಹರಂ ಆಚರಣೆಯು ಸುಮಾರು ೨೫೦ ವರ್ಷಗಳಿಂದಲೂ ಹಳೆಯ ಬೆಂಗಳೂರಿನ ಭಾಗದಲ್ಲಿ ಸಾಂಗವಾಗಿ ನಡೆದುಕೊಂಡು ಬರುತ್ತಿರುವುದಕ್ಕೆ ಸಾಕಷ್ಟು ಪುರಾವೆಗಳನ್ನು ಒದಗಿಸಬಹುದಾಗಿದೆ. ಇಲ್ಲಿ ನೆಲೆಸಿದ ಸೂಫಿ ಸಂತರ ಆಶ್ರಯದಲ್ಲಿ ಜರುಗುತ್ತಿದ್ದ ಮೊಹರಂ ಆಚರಣೆ, ಉರುಸುಗಳು ದೀರ್ಘ ಇತಿಹಾಸವನ್ನು ಹೊಂದಿದೆ. ಈ ಲೇಖನದಲ್ಲಿ ಮೊಹರಂ ಆಚರಣೆಗೆ ಚಾರಿತ್ರಿಕ ಹಿನ್ನೆಲೆ, ಬೆಂಗಳೂರಿನಲ್ಲಿ ಜರುಗುವ ಮೊಹರಂ ಆಚರಣೆಗಳ ವಿಧಾನಗಳನ್ನು ವಿವರಿಸುವ ಪ್ರಯತ್ನವನ್ನು ಮಾಡಲಾಗಿದೆ. ಕಾಟನ್‌ಪೇಟೆ, ಚಿಕ್ಕಪೇಟೆ, ಬಳೇಪೇಟೆ, ಕಬ್ಬನ್‌ಪೇಟೆ, ಕುಂಬಾರಪೇಟೆ, ಕಾಡುಗೊಂಡನಹಳ್ಳಿ, ಮಾವಳ್ಳಿ, ಗೋರಿಪಾಳ್ಯ, ಮುನಿರೆಡ್ಡಿ ಪಾಳ್ಯ ಮೊದಲಾದ ಸ್ಥಳಗಳಲ್ಲಿ ನಡೆಯುವ ಮೊಹರಂ ಆಚರಣೆಗಳನ್ನು ಗಮನಿಸಬಹುದಾಗಿದೆ. ಮೊಹರಂ ಆಚರಣೆಯು ಅನ್ಯಾಯದ ವಿರುದ್ಧ ಹೋರಾಡಿ ವೀರ ಮರಣ ಹೊಂದಿದ ನಾಯಕರುಗಳ ನೆನಪಿನ ದ್ಯೋತಕದ ಶೋಕಾಚರಣೆ ಇದಾಗಿದೆ. ಐತಿಹಾಸಿಕವಾಗಿ ಜರುಗಿದ ಘಟನೆಯನ್ನು ಇಂದಿಗೂ ಸ್ಮರಿಸುವುದು, ಯುದ್ಧದಲ್ಲಿ ಹುತಾತ್ಮರಾದ ವೀರರ ಶೌರ್ಯವನ್ನು ಹೊಗಳಿ ಕೊಂಡಾದುವುದನ್ನು ಇಲ್ಲಿ ಕಾಣಬಹುದು.